खानेपानीमा हामी गफ हैन काम गरेर देखाउछौ — अध्यक्षका उमेदवार उपाध्याय

खानेपानी तथा सरसफाइ उपभोक्ता संस्था चन्द्रनिगाहपुरको जेठ २७ गते शनिबार हुन गइरहेको निर्वाचनको लागि किशोर प्रसाद उपाध्यायको नेतृत्वको प्यानल पनि चुनावी मैदानका उत्रिएको छ । उपाध्याय प्यानलका उम्मेदवार र शुभचिन्तकहरुले उपभोक्ता भेटघाट कार्यक्रम सकेका छन् । ३० वर्ष कृषि विकास बैंकमा अधिकृत तहबाट सेवा निवृत हुनुभएका उपाध्याय स्वच्छ छविका, निर्विवाद तथा इमान्दार व्यक्तित्वको रुपमा चिरपरिचित छन् । उनको व्यक्तित्वको प्रभावले पनि सो प्यानलले सहजै निर्वाचन विजयी हुने विश्वास गरेका छन् । आसन्न निर्वाचनको तयारी र अपेक्षा बारेमा अध्यक्षको पदका उम्मेदवार उपाध्यायसँग गरिएको कुराकानीको सम्पादित अंश ।
उपभोक्ताहरुसँगको भेटघाट सक्नुभएको छ , अवस्था के पाउनु भएको छ ?
उपभोक्ताहरुबाट एकदमै राम्रो प्रतिक्रिया पाएका छौं । उहाँहरुले हामीबाट निकै आशा राख्नु भएको पायौं । खानेपानीको व्यवस्थापनको बारेमा उहाँहरुको निकै गुनासो छ । उपभोक्ता भेटघाटको क्रमम उहाँहरुको घरमा पुग्दा कतिपय उपभोक्ताहरुको घरमा धारा जडान गरेको लामो समय भइसक्दा पनि मिटर जडान नगरिएको , जडान गरिएका मिटरहरुको पनि रिडिङ्ग नगरिको, समयमा मर्मत तथा जडान नगरिएको लगायतका समस्याहरु देखियो । व्यवस्थापनको बारेमा पनि धेरै गुनासाहरु उपभोक्ताहरुको रहेको छ । उहाँहरुले हामीहरुको प्यानलले यी समस्याहरुको समाधान गर्न सक्छन् भन्ने विश्वास राख्नु भएको र त्यहीँ अनुसार जितको शुभकामना दिनुभएको छ । यसले हामीलाई निकै उत्साहित बनाएको छ ।
तपाईहरुको टिममा को को हुनुहुन्छ र तपाईहरुको मुख्य मुख्य एजेण्डा के के हुन् ?
हाम्रो टिममा चन्द्रपुरका विभिन्न संघसंस्था तथा समाजिक क्षेत्रका कार्य गर्दै आइरहनु भएका अनुभवी तथा इमान्दार व्यक्तित्वहरु हुनुहुन्छ । उपाध्यक्षमा डोल बहादुर ठाडा मगर , सचिवमा अवदेशहरी भट्टराई, कोषाध्यक्षमा बिनिता बख्रेल , सदस्यहरुमा दुुर्गा प्रसाद हुँमागाइ (सरोज), प्रल्हाद मैनाली, राम प्रसाद साह, बलराम सापकोटा, भरत प्रसाद अधिकारी, वृजेश प्रसाद साह (पंकज) महिला सदस्यहरुमा कल्पना दाहाल, जानुका तिमल्सिना, रत्ना कुमारी खड्का हुनुहुन्छ । उहाँहरुको सामाजिक कार्यको अनुभव र दक्षताले हाम्रो प्यानलले जित पश्चात खानेपानी तथा सरसफाइ उपभोक्ता संस्था चन्द्रनिगाहपुरलाई देशकै अब्बल संस्थाको रुपमा विकास गर्नेमा हामी ढुक्क छौं ।
हाम्रा मुख्य एजेण्डाहरु विगतका अनियमितताहरुको छानविन गरी दोषी पाइएकाहरुलाई कार्वाहीको दायरामा ल्याउने, उपभोक्ताहरुलाई शुद्ध, स्वच्छ र स्वस्थ खानेपानीको व्यवस्था गर्ने ,संस्थाको हिसाब किताब आधुनिक ढंगले राख्दै पारदर्शी बनाउने ,सडक विस्तार लगायत विविध कारणले अवरुद्ध खानेपानीको तत्काल व्यवस्था मिलाउने , पिउने पानीको महसुल घटाउने , नियमावली बनाएर गरीब तथा विपन्न परिवारलाई निःशुल्क खानेपानीको प्रवन्ध गर्ने , प्रत्येक महिना संस्थाको बारेमा उपभोक्ताहरुलाई जानकारी गराउन प्रगति विवरण सार्वजनिक गर्ने , चुहावट पूर्ण रुपमा नियन्त्रण गर्छौँ, बाँकी बक्यौता समयमै उठाउने, खानेपानीको कार्यालयबाट लिनुपर्ने सुविधा घरमै बसेर लिन मिल्ने गरी ’डिजिटल खानेपानी संस्था’ बनाउने लगायतका रहेका छन् ।
तपाईहरुको विपक्षी प्यानलले यस अघि सो संस्थामा भएका आर्थिक अनियमिता र भ्रष्ट्रचार चोख्याउन दलगत गठबन्धन गरेको र तपाईहरु विजयी भएका भ्रष्ट्रचार झन् मौलाउने भनेर प्रचार गरिरहेका छन् नि , के भन्नुहुन्छ?
म भ्रष्ट्रचार गर्दिन् र गर्नपनि दिन्न । मेरो ३० वर्षे बैकिंङ्ग करियरमा एउटा पनि आर्थिक अनियमिता, घुस मागेर काम गरेको लगायतको कुनैपनि आरोप लागेनन् । अझैपनि मलाई चिन्नेहरु मैले बैंकमा छदाँ इमान्दारिता पूर्वक उहाँहरुलाई सहज सेवा दिएको सम्झनुहुन्छ । हाम्रा सबै उम्मेदवारहरु आफ्नो क्षेत्रमा स्थापितनै हुनुहुन्छ । उहाँहरुलाई खानेपानीको कार्यसमितिमा जाऔंला र कमाउँला भन्ने छैन् । हामी सबै यो संस्थामा गएर आर्थिक हिसाब किताब दुरुस्त राखी नागरिकलाई सहज खानेपानी वितरण गर्न प्रतिवद्ध छौं । जहाँसम्म यस अघिका समितिले गरेका आर्थिक अनियमिता र भ्रष्ट्रचारहरुका कुराहरु छन् , त्यसमा हामी छानविन गरेर दोषी पाइएका जो कोहीँलाई पनि कानुनी दायरामा ल्याउन हामी कटिवद्ध छौं । भ्रष्ट्रचारको कुरामा पार्टी होइन दोषी हेर्ने हो । हाम्रा विपक्षीहरुसँग हामी विरुद्ध कुनै एजेण्डा नभएपछि यस्ता अफवाहहरुको सहायता लिइरहेका छन् , जसलाई जनताले पत्याउनु भएको छैन् ।
खानेपानीको संस्थामा राजनिति गठबन्धन गरेर चुनाव लड्नुको अर्थ के त?
कुनै पनि सार्वजनिक संघसंस्थाहरु समाजमा रहेका सबै राजनितिक दल र नागरिक समाजको सहभागिता र सहकार्यमा मात्र सफल हुने कुरामा कुनै दुइमत छैन् । यस संस्थामा पनि हामीले सहमतिको लागि अधिकतम प्रयास गरेका हौं तर हाम्रा विपक्षीहरुले विभिन्न बहाना गरेर मान्नुभएन र चुनाव हुनेभयो । चुनाव हुने निश्चित भएपछि हामीले संंस्थाको हितमा एजेण्डा मिल्नेहरु एक ठाउँमा उभिएर प्यानल बनाएर चुनाव लडेका हौं । राजनितिक गठबन्धन भएको भए त राजनितक दलको चुनाव चिन्ह भइहाल्थ्यो नि, ‘हाँस’ हुन्थ्यो र ? त्यसैले पार्टीहरुको गठबन्धन भयो भन्नु फगत प्रोपोगण्डा मात्र हो ।
तपाइहरुको जित्ने आधार के हो ?
हाम्रो जित्ने आधार सचेत उपभोक्ताहरुनै हुनुहुन्छ । हामीले अगाडि सारेका एजेण्डाहरुलाई उहाँले विश्वास गर्नुभएको छ । उपभोक्ताहरुलाई ‘भ्रष्ट्रचार, अनियमिता नमिसिएको शुद्ध खानेपानी’ पिलाउने हाम्रो प्यानलको लक्ष्य रहेको छ र यसलाई हामी हाम्रो जितपछि व्यवहारमा कार्यन्यवन गर्छौ भन्नेमा उपभोक्ताहरु पनि ढुक्क हुनुहुन्छ । हाम्रो प्यानल प्रतिको उपभोक्ताहरुको आश, भरोसा, विश्वासनै हाम्रो जितको आधार हो ।
अन्त्यमा आम उपभोक्ताहरुलाई के भन्न चाहनुहुन्छ ?
अहिलेका उपभोक्ताहरु सबै सचेत हुनुहुनुहुन्छ । उहाँहरु दुबै प्यानलका उम्मेदवाहरुको विगत , वर्तमान सबै थाहा छ । उम्मेदवारहरुले सामाजिक क्षेत्रमा पु¥याउनु भएको योगदानको बारेमा जानकार पनि हुनुहुन्छ । त्यसैले आम उपभोक्ताहरु कुनै पनि प्रोपोगण्डाको पछाडि लाग्नुहुँदैन् । अन्त्यमा उपभोक्ताहरुलाई भोली शनिबार जनज्योति बहुमुखी क्याम्पसमा हुने निर्वाचनमा हाम्रो प्यानललाई ‘हाँस’ चुनाव चिन्हमा मतदान गरेर विजयी बनाउनु हुन हार्दिक अनुरोध गर्दछुँ ।हाम्रो जितपछि ‘नारामा होइन, धारामा पानी’ हुनेछ ।